ភ្នំពេញ៖ ក្រុមម្ចាស់ផ្ទះអាយុក្រោម២៣ឆ្នាំកម្ពុជា ដែលម្ចាស់ផ្ទះនឹងត្រូវបើកយុទ្ធនាការស្វែងរកពិន្ទុ នៅក្នុងការប្រកួតដំបូងជាមួយក្រុមភ្ញៀវ ព្រុយណេ ក្នុងពូល A វេលាម៉ោង ៧:០០យប់ថ្ងៃ១៣កើត ខែមាឃ ឆ្នាំឆ្លូវ ត្រីស័ក ព.ស. ២៥៦៥ ត្រូវនឹងថ្ងៃចន្ទ ទី១៤ ខែកុម្ភៈ ឆ្នាំ២០២២ នៅពហុកីឡដ្ឋានជាតិមរតកតេជោ នៃព្រឹត្តិការណ៍ជម្រើសជើងឯកអាស៊ីអាគ្នេយ៍ យុវជនអាយុក្រោម២៣ឆ្នាំ AFF U23 CHAMPIONSHIP 2022។

ចំពោះ២ប្រកួតបន្ទាប់របស់ម្ចាស់ផ្ទះ U23កម្ពុជា នៅក្នុងវគ្គសន្សំពិន្ទុ ក្នុងពូល A នេះ ត្រូវប៉ះជាមួយក្រុមហ៊្វីលីពីន នាថ្ងៃទី១៧ កុម្ភៈ និងទីម័រខាងកើត នាថ្ងៃទី២០ កុម្ភៈ វេលាម៉ោង៧:០០យប់ដូចគ្នា និងនៅពហុកីឡដ្ឋានជាតិមរតកតេជោ។

យោងតាមការចុះផ្សាយរបស់ទីភ្នាក់ងារសារព័ត៌មានជាតិកម្ពុជា AKP បានលើកឡើងថា ក្រុមជម្រើសជាតិបាល់ទាត់កម្ពុជា ស្ថិតក្រោមការដឹកនាំរបស់លោក Keisuke Honda អ្នកចាត់ការទូទៅ និងលោក RYU HIROSE គ្រូបង្គោល។ លោក Keisuke Honda បាននិយាយម្សិលមិញថា លោកសង្ឃឹមថា មនុស្សមួយចំនួនអាចមកកីឡដ្ឋានសម្រាប់ការប្រកួតនៅថ្ងៃនេះ។ លោកដឹងថា វាប្រហែលជាមិនងាយស្រួលទេ ចាប់តាំងពីស្ថានភាពនេះ ប៉ុន្តែកីឡាកររបស់យើង និងលោកត្រូវការអ្នកគាំទ្រ។

ព្រឹត្តិការណ៍ AFF U23 CHAMPIONSHIP 2022នៅសល់១០ប្រទេសចូលរួម ក្រោយការដកខ្លួនរបស់ឥណ្ឌូណេស៊ី ដោយពូល A មានម្ចាស់ផ្ទះ កម្ពុជា ព្រុយណេ ហ៊្វីលីពីន និងទីម័រខាងកើត ខណៈពូលBមាន ម៉ាឡេស៊ី មីយ៉ាន់ម៉ា និងឡាវ រីឯពូលCមាន ថៃ វៀតណាម និងសិង្ហបុរី។

ការប្រកួតចាប់ផ្តើមពីថ្ងៃទី១៤-២៦ ខែកុម្ភៈ ឆ្នាំ២០២២ដោយប្រើប្រាស់កីឡដ្ឋានចំនួនពីរ គឺពហុកីឡដ្ឋានជាតិមរតកតេជោ និងកីឡដ្ឋានព្រីនស៍។ វគ្គសន្សំពិន្ទុចាប់ផ្តើមប្រកួតពីថ្ងៃទី១៤ ដល់ថ្ងៃទី២២ ខែកុម្ភៈ ហើយក្រុមចំណាត់ថ្នាក់លេខ១នៃពូលទាំង៣ បូកនឹង១ក្រុមដែលមានចំណាត់ថ្នាក់លេខ២ ល្អផ្តាច់គេនឹងបានឡើងវគ្គពាក់កណ្តាលផ្តាច់ព្រ័ត្រ នាថ្ងៃទី២៤ ខែកុម្ភៈ និងការប្រកួតវគ្គផ្តាច់ព្រ័ត្រនឹងធ្វើឡើងនាថ្ងៃទី២៦ ខែកុម្ភៈ ដោយចាប់ពីវគ្គពាក់កណ្តាលផ្តាច់ព្រ័ត្រ និងផ្តាច់ព្រ័ត្រធ្វើឡើងនៅពហុកីឡដ្ឋានជាតិមរតកតេជោ ទាំង៤ប្រកួត៕